Þessi Hjólhestur markar ákveðin tímamót því þrjátíu ár eru frá því fyrsti Hjólhesturinn kom úr. Klúbburinn var orðinn tveggja ára þegar útgáfa Hjólhestsins hófst en hann var sprækur, því sum árin kom hann út fimm sinnum. Blöðin voru allt frá 68 bls.niður í að vera svo lítil að vera bara kölluð „laufblöð“.
Það hefur margt breyst á þessum 30 árum því í upphafi var textinn prentaður í misgóðum nálaprenturum, klipptur til á pappír og teikningar stækkaðar eða minnkaðar í ljósritunarvélum, allt límt saman á pappír og fjölritað. Nú fáum við texta og myndir í tölvupóstum og hugtökin að klippa og líma hafa allt aðra merkingu í tölvuvinnu nútímans.
Alda Jóns við fataskápinn - heimili ÍFHK í Þróttheimum og salurinn fyrir neðan
Klúbburinn er kenndur við fjallahjólin sem voru mikil bylting á sínum tíma, ekki síst þegar kom að ferðamennsku á reiðhjólum sem alltaf hefur verið sterkur þáttur í starfi klúbbsins. En þau nýttust ekki síður innanbæjar því við stofnun voru bara nokkur ár frá því að hjólreiðar á gangstéttum voru leyfðar. Og þar sem bílaumferðin var farin að þrengja að umferð hjólandi hrökkluðust margir upp á gangstéttarnar en þurftu þá að hoppa upp og niður háa kanta við hver gatnamót því flágar tíðkuðust ekki þá og þá gagnaðist að hafa dempara.
Stjórnarfundur í herberginu í Austurbugt 1999 og salurinn fyrir neðan
En á þessum 32 árum hefur klúbburinn vaxið frá því að hafa pósthólf sem heimilisfang og fataskáp sem heimili meðan við hittumst mánaðarlega í Þróttheimum og horfðum dáleidd á ljósmyndir úr ferðalögum varpað upp á tjald úr slidessýningarvél. Seinna fluttum við í Austurbugt þar sem við höfðum lítið herbergi á leigu, aðgang að fundarsal og plássi þar sem við gátum yfirfarið hjólin okkar. Það húsnæði þurfti að víkja fyrir Hörpu en við fengum þá inni í núverandi húsnæði varla fokheldu og lögðu margir hönd á plóg við að standsetja það í núverandi horf.
Klúbbhúsið Brekkustíg 2 var afhent fokhelt 1999. Þarna er verið að mála og undirbúa að flota gólfið uppi.
Alla útgáfu Fjallahjólaklúbbsins frá upphafi má lesa á Issuu. Fjallahjólaklúbburinn á Issuu
Páll Guðjónsson - við ritstjórnarstörf 1999 á samsettri mynd fyrir ofan.