20 ½  árs saga ÍFHK rifjuð upp

Það er venja að rifja upp farinn veg á tímamótum eins og núna þegar 20 ½ ár er frá stofnun Íslenska fjallahjólaklúbbsins og nýr áratugur er runninn upp þar sem margir spá stóraukinni notkun reiðhjólsins sem samgöngutækis. Við ætlum að rifja upp sögu klúbbsins og starf á næstunni með því að setja á vefinn okkar öll fréttabréf klúbbsins í gegnum tíðina. Hjólhesturinn kom út í fyrsta skipti vorið 1992 og inngangurinn endurspeglaði mikinn metnað:
“Hjólreiðar á íslandi í 100 ár - og loksins kemur hér fyrsta blaðið sem tengist þeim. Tími var nú kominn til að þessi geiri menningar, útivistar, íþrótta og heilbrigðrar skynsemi léti í sér heyra. Nú fjölgar þeim dag frá degi sem hafa hjól fyrir sinn aðalfararskjóta. Innanbæjar sem utan í sátt við móður jörð sem orðin er illa haldin af óábyrgri hegðun mannanna! Við skulum vona að næstu hundrað ár verði hundrað ár hjólsins."

"Vegna stóraukins áhuga á hjólreiðum langaði okkur að safna á einn stað allrahanda upplýsingum um þennan ferðamáta. Við höfum því dregið samari í þetta fyrsta tölublað Hjólhestsins þýtt og frumsamið efni hjólreiðamönnum til gagns og gamans: leiðbeiningar, vörukynningar og ferðasögur með meiru. Og annað eins er nú fyrirliggjandi. Því er von okkar sú að næsta tölublað Hjólhestsins rúlli fljótt í kjölfar þessa. Ef menn hafa áhuga á að starfa með klúbbnum eru þeir hvattir til að setja sig í samband við forystumenn hans.”

Þetta markmið að safna saman á einn stað allrahanda upplýsingum hefur tekist einstaklega vel hjá klúbbnum í gegnum tíðina og hafa þær verið aðgengilegar lengi á vef klúbbsins og alltaf safnast meir og meir.

Í blaðinu eru meðal annars tvær skemmtilegar ferðasögur. Önnur fjallar um “fyrstu alvöru ferð ÍFHK” sem var Landmannalaugaferð í september 1991 . Hin segir frá fjallahjóla- og gönguferð í Borgarfjörðinn og ofan í Víðgelmi nóvember 1991 .

Fyrsta tölublað fyrsta árgangs Hjólhestsins má lesa hér fyrir neðan. Smellið á blaðið til að sjá það stórt, annar smellur stækkar það enn meir og með stiku efst er hægt að velja mestu stækkun. Esc takkinn lokar blaðinu.