Fundarboð aðalfundar Íslenska Fjallahjólaklúbbsins starfsárið 2008-2009.
Fundurinn verður haldinn í klúbbhúsinu að Brekkustíg 2 fimmtudaginn 15 október 2009 kl 20:00.

Fimmtudaginn 8. október verður haldið hið árlega vetrarundirbúningsnámskeið þar sem Magnús Bergsson sjálfur mun deila reynslu sinni með okkur. Er virkilega hægt að hjóla allan veturinn? Hvað þarf til að geta hjólað að vetrarlagi? Geta allir hjólað í hálku? Þola dempararnir kuldann? Frýs ekki keðjan? Hvað er hamingja? Hver er tilgangur lífsins? Öllum þessum spurningum verður svarað, öllum þínum spurningum varðandi hjól + vetur og miklu fleirum til. Námskeiðið er ókeypis og frítt inn á meðan húsrúm leifir.

Fimmtudaginn 24. sept. kl. 20, mun borgarfulltrúinn og hjólreiðamaðurinn knái, Gísli Marteinn heimsækja Íslenska fjallahjólaklúbbinn. Gísli fer fyrir Hjólreiðanefnd Reykjavíkur sem er eina nefndin sem hann sleppti ekki úr höndum sér á meðan á námsdvöl hans stóð í Edinborg.

Nú er Gísli mættur aftur til fullra starfa sem borgarfulltrúi, sprækur sem lækur og mætir hjólreiðamönnum ÍFHK á baðstofuloftinu til samtals og skoðananviðrana að Brekkustíg 2.

Gísli Marteinn mun segja frá störfum Hjólreiðanefndarinnar, tala almennt um hjólreiðamál í borginni og sína framtíðarsýn á hjólaborgina Reykjavík. Auk þess óskar hann eftir góðu samtali og samstarfi við hjólreiðamenn um það sem þarf að gera til þess að efla hjólreiðar á Höfuðborgarsvæðinu.

Það verður heitt á könnunni að vanda og hver veit nema Fjölnir baki nokkrar vöfflur fyrir gesti og gangandi. Viðgerðaraðstaðan opin á neðri hæðinni. Allir velkomnir!

Fjallahjólaklúbburinn óskar eftir ferðasögum til byrtingar á netinu og í fréttabréfinu Hjólhestinum. Ferðasögur, greinar, pistlar eða annað ritað efni óskast einnig,

Sendist á This email address is being protected from spambots. You need JavaScript enabled to view it.

Fimmtudaginn 10 sept. var haldið svokallað kompukvöld sem heppnaðist vonum framar. Markmiðið er eins og áður hefur komið fram að félagsmenn og aðrir geti komið með hjólagræjur af öllum toga og selt eða skipt. Rúnar í Markinu kom með landburð af allskonar dóti allt frá dekkjum til dempara og allt þar á milli. Það var mikið gramsað og pælt og seldist víst meginþorrinn af öllum dásemdunum. Arnaldur stóð styrkur á kantinum með rjúkandi eðalkaffi sem hann töfraði fram úr himinblárri kaffivél. Nokkuð var um viðgerðir á reiðhjólum á neðri hæðinni og er alltaf nóg af höndum til þess að aðstoða við stórt eða smátt. Margt spennandi er á döfinni m.a. undirbúningsnámskeið fyrir vetrarhjólreiðar þar sem verður farið ítarlega í val á nagladekkjum, ljósum, fatnaði og fleira...fylgist því vel með á næstunni.

Núna á fimmtudaginn verður haldið kompukvöld í klúbbhúsinu milli kl 20:00 og 22:00. Kompukvöld var síðast haldið í klúbbhúsinu fyrir ári síðan og því orðið löngu tímabært að endurtaka það.

Kæru félagar.
Það er búið að ákveða óvissuferð haustsins. Hún verður farin 12. og 13. sept. nk. 40 km á lau. og 45 km á sun. Algjörlega sjálfbær... samt einn trússbíll sem tekur svefnpokana og matinn. Kostnaður max 3000 kr. á fullorðinn, minna fyrir börn. Trúss, gisting, kvöldmatur og hafragrautur á sunnudagsmorgninum. Hjólað alla leið. Gisting í afdölum;-)

Um 30 manns voru í pizzuveislunni sem haldin var 22. ágúst þeim til heiðurs sem buðu fram aðstoð sína við framkvæmd Reykjavíkurmaraþonsins í ár. Garðar Erlingsson skipulagði hlutverk hvers og eins og þökkum við honum kærlega fyrir sérlega vel unnið starf.

Kæru félagar. Þá er komið að formlegri lokaferð þriðjudagshjólreiðanna. Við hittumst við Fjölskyldu- og húsdýragarðinn kl. 19 nk. þriðjudag og hjólum saman yfir götuna yfir til GÁP sem býður okkur í glæsilega grillveislu. Búðin verður opin og aldrei að vita nema einhver góð tilboð séu í boði þetta kvöld. Allir sem hafa komið með í ferðir sumarsins - sem og þeir sem alltaf ætluðu að koma og allir hinir líka, eru hjartanlega velkomnir með okkur í veisluna.

Kl. 15:00 á Menningarnótt í Reykjavík munu glaðir hjólakappar hittast á miðju Miklatúni og rúlla þaðan saman á reiðhjólum sínum um bæinn. Allir eru velkomnir, endilega bjóðið ykkar fésbókarvinum líka með! Það verður gríðarleg stemning í hópnum. Tónaflóð mun fylgja okkur á leiðinni (eldhress hjólalög) og við hvetjum fólk til að hjóla með bökin ber og skrifa á þau skemmtileg hjólaslagorð. Svo er um að gera að mæta í búningum eða skrautlegum fötum. Mætum endilega á fjölskrúðugum farartækjum (þeir sem eiga), t.d. liggihjóli, tvímenningshjóli, körfuhjóli, hjóli með aftanívagn, með tengihjól o.s.frv.

Myndasýning úr þremur hjólaferðum verður sýnd í stóra salnum í Sambíóinu Álfabakka. Sýning hefst kl. 11:00 f.h. nú laugardag 15. ágúst og stendur yfir í eina klst. Myndirnar munu sýna frá hjólaferðum sem farnar voru um Trékyllisheiði á Stöndum, um Gnúpverjaafrétt á suðurlandi og um Gæsavatnaleið norðan Vatnajökuls austur að Kárahnjúkum.
Allir eru velkomnir, takið með ykkur gesti. Aðgangur ókeypis  

Halli og Mummi

Í kvöld 11/8/2009 verður farið í þriðjudagsferð kl 19:00 frá Fjölskyldu og húsdýragarðinum eins og venjulega. Stefnan er tekin á Gróttu sem er náttúrulega alveg himneskt svæði, sérstaklega í góðu veðri eins og lítur út fyrir í kvöld. Að þessu sinni verður brugðið útaf vananum og er ætlunin að skella sér í smá sjósund í leiðinni. Undirritaður hefur gert þetta um allnokkuð skeið og mælir hann sérstaklega með sundi af þessu tagi. Nú er bara að taka sundföt og handklæði með í kvöld ! 
Kveðja. Garðar Erlingsson

Opið hús næsta fimmtudag kl 20:00 - 22:00 (eða lengur). Viðgerðaaðstaðan opin og heitt á könnunni. Nokkrir meðlimir klúbbsins hafa mælt sér mót þarna og ætla að koma með hjálparmótora og búnað til að létta mönnum lífið. Hafir þú áhuga á því hvernig má betrumbæta hjólið eða ákveðnar skoðanir ertu sérstaklega velkomin/n. En annars þá er opið hús öllum opið eins og gefur að skilja.

Tryggvi Hjaltason frá Rútsstöðum í Eyjafirði og öflugur þátttakandi í þriðjudagshjólaferðum Íslenska fjallahjólaklúbbsins kemur í klúbbhúsið fimmtudaginn 30. júlí og sýnir myndir úr hjólaferð sem hann fór um Rallarveginn sem liggur í nágrenni Sognsfjarðar, um Harðangursjökulinn og endaði í Voss. Þetta var fjögurra daga hjólaferð og var meira en fjórfaldur aldursmunur á þeim yngst og elsta í hópnum. Tryggvi er fæddur 1938 og hefur hjólað víða um Noreg. Fór m.a. frá Nordkapp til Osló árið 1959 eða fyrir 50 árum síðan.
Það verður kaffi á könnunni og viðgerðaraðstaðan opin. Allir hjartanlega velkomnir.

Næsta þriðjudagsferð Fjallahjólaklúbbsins verður óvissuferð undir leiðsögn Fjölnis formanns. Enginn veit hvað verður, allir eru hvattir til þátttöku og jafnframt skorum við á þá sem þora; að koma með eitthvað óvænt innlegg í ferðina!! Bland í poka - syngja einsöng á völdum stað, koma með jólaseríu á hjólinu sínu eða hvað eina sem fólki dettur í hug og lífgar uppá tilveruna. Þó manni detti ekkert í hug, þá er maður líka velkominn:-)
Lagt af stað frá Fjölskyldu- og húsdýragarðinum kl. 19.

Hér eru nokkrar myndir frá 20 ára afmæli Íslenska fjallahjólaklúbbsins. Boðið var upp á glæsilega afmælistertu og fleira góðgæti. Stofnendur klúbbsins mættu og flestir formenn í gegnum tíðina.

Næstkomandi fimmtudag 9/7 verður afmæliskaffi í klúbbhúsinu. Fjallahjólaklúbburinn er orðinn tvítugur og er því samkvæmt lögum bæði sjálf og fjárráða. Borðin munu svigna undan glæsilegum kaffiveitingum og er það von okkar að sem flestir sjái sér fært að mæta. Að vanda verður létt stemning í loftinu og er þetta gullið tækifæri fyrir alla klúbbfélaga hittast og kannski þá sérstaklega að hitta stofnfélagana. Að öllum líkindum verða sagðar nokkrar mis vafasamar ferðasögur og er ég illa svikinn ef ákveðnir aðilar ausa ekki úr sínum ótæmandi viskubrunni. Þetta verður bara gaman !

Ortlieb sjópokar og töskur. Framleitt í Þýskalandi. 5 ára ábyrgð! Vatnsþétt, rykþétt, fislétt og níðsterkt.

Bjóðum félagsmönnum 15% kynningarafslátt  í  júli  hjá okkur í Smiðsbúð 6  í  Garðabæ ( sama húsnæði og Hirzlan).

Ortlieb töskur og pokar henta vel til allra ferðalaga, sérstaklega þar sem er mikil bleyta t.d. í báta, sleða og fjórhjólaferðir. Frekari upplýsingar er að finna á  www.vild1.com eða hafið samband í síma 564-5040.

Afgreiðslutímar  í sumar; mánud. – föstudaga  kl. 13 - 18.

Með kveðju, Vild ehf. This email address is being protected from spambots. You need JavaScript enabled to view it.

Nú þegar sumarið er komið á Íslandi og flestir búnir að plana eitthvert flakk um landið í sólinni í sumar er hann Olivier Germain í Montreal, Kanada að plana hjólaferð hringinn í kringum Ísland í nóvember 2010. Þetta verður ekki fyrsta ferðin hans um landið því 2007 þræddi hann alla strönd landsins á hjóli. Kíkið á vef hans til að fræðast meir um ferðina og manninn.

það verður ekið frá Reykjavík föstudagskvöldið 19. júní frá klúbbhúsinu að Brekkustíg 2 kl 18:00 og Árbæjarsafni kl 19:00. að Fitjum í Skorradal og gist. Á laugardeginum verður hjólaður hringurinn í kringum vatnið, farið í sund í Hreppslaug og grillað og leikið um kvöldið. Aftur gist að fitjum og ekið til baka til Reykjavíkur á sunnudeginum. Hægt er að gera þennan hjóltúr að dagshjóltúr ef tími er takmarkaður. Á opnu húsi í kvöld milli kl 20:00 og 21:00 verður kynning á ferðinni í máli og myndum úr síðustu hjólaferð um þessar slóðir.